Die lekkerste vyftig persent

As mens lank genoeg op dieselfde plek bly leef, het jy op 'n dag elke deel daarvan al béleef. Ek ry oor die kop waar die Uniegebou en die Presidentswoning staan, op pad na 'n sekere boekwinkel, op soek na 'n sekere boek. Soos ek vorder, kom plekname, straatname, soortname, eiename, versamelname en mensname op my af, Goewermentslaan raak 'n duikweg en Arkadia word ‘n opslaandorp vol karton- hindernisse, boosdoeners en omstanders wat, in geval van swak oordeel, kollaterale skade kan word.

My beweegrede vir dié boek-koop is net so sirkulêr soos die pad om Meintjieskop. In die Laeveld is daar 'n plek genaamd Mataffin en in Mataffin is daar 'n landgoed en in die landgoed is daar 'n gastehuis en in die gastehuis se een kamer is daar twee memoirs, geskryf deur meneer en vrou Hall onderskeidelik. Dié twee boeke op die bedkassie is die perfekterende stap van gaste se intree in die ou Hall-familiewoning. Hugh en Grace se woorde skets die geskiedkundige boerdery en die inwoners se ervarings in die vroegste jare en beeld die bedrywighede in detail uit. ‘n Manuskrip waaraan ek werk, speel af in daardie omgewing en in daardie tyd en ek het besef ek moes my eie kopieë hê. Synde nie ‘n boekedief nie het ek, terug in Pretoria, begin soek.

Tot dusver kon ek dit nêrens kry nie, selfs nie by daardie boekwinkel aan die noordekant van Meintjieskop nie (Rutland Books). Ek kry toe wel daar iets soortgelyks, The hill called Grazing: The story of a Transvaal farm, deur AG McRae.

Vir my is vyftig persent van die lekkerkry van ‘n vakansie die uitsien en die inpak. Ingelyks is (die lekkerste) vyftig persent van die skryf van 'n geskiedkundige storie die oplees en die uitvind. Ek kan nie wag om te begin nie.